Իմ տեսակետից, հիմնական խնդիրը, որը պետք է հասկանալ, ոչ թե ծրագրերի կամ մանրամասների մակարդակում է, այլ իշխանության բնույթի փոփոխության ընկալման մակարդակում։ Այսօրվա «ամեն ինչի ունակների» իշխանությունը պետք է փոխարինվի իսկապես նոր մոդելիով՝ «ընդունակների իշխանությամբ»։
Ներկայիս համակարգը, որը հաճախ անվանում են «ամեն ինչի ունակների իշխանություն», իրականում ոչինչ չի փոխում։ Այն միանձնյա կառավարման մոդել է, որը զուրկ է զսպման մեխանիզմներից և ուժերի համախմբումից։ Այն հիմնված է մեկ անձի՝ իրեն հայտնի մոտիվացիայի վրա, որը կամավորապես պահպանում է անտարբերության, վախերի, անհուսության և սուտի մթնոլորտը։
Իսկ «ընդունակների իշխանությունը» լրիվ հակառակն է։ Այն նշանակում է պետության կառավարում ոչ թե մեկ անձի, այլ ինստիտուտների միջոցով, միանձնյա կառավարման բացառմամբ, զսպման մեխանիզմների և ունակ անհատների համախմբման հիմքով։ Այս փոխակերպումը պետք է դառնա մեր ընդհանուր նպատակը։
Այս փոխակերպումը հնարավոր է դարձնել միայն այն պայմանով, որ առաջին հերթին մենք, որպես բացատրողներ, սա հասկանանք։ Քանի որ, ինչպես հակաիշխանական ուժերի համար, այնպես էլ ընդհանուր հասարակության համար, ամենակարևոր խնդիրը մթնոլորտը փոխելն է։ Ծրագրերը, իհարկե, կարևոր են, բայց դրանք տեղ հասնելու, լսվելու և դառնալու ընտրության ռեսուրս՝ ընտրազանգվածների համար, պահանջում են նախապես փոխված մթնոլորտ։
Մեր խնդիրն է ստանալ փոփոխությունների պատրաստ և պարտությունից հետո վերականգնման պահանջ ներկայացնող հասարակություն։ Ճիշտ աշխատելու դեպքում վստահ եմ՝ սա շաբաթների ընթացքում կարելի է անել։ Բայց պետք է իսկապես խնդիր դնել ունենալ «ընդունակների իշխանություն», ոչ թե՝ նոր հերթական միանձյան։
Այս պայքարում բոլորն ունեն իրենց դերը։ Պետք է ճիշտ հասկանալ հանրային տրամադրությունները, որոնք չեն հայտնվում միայն սոցիոլոգիական վարկանիշների մեջ։ Բոլոր ուժերի և անհատների լայն մասնակցությունը, ճիշտ ձևաչափերի միջոցով և առանց սկզբնական ամբիցիայի, կարող է դառնալ այս փոխակերպման հիմնական շարժիչ ուժը։
Ի վերջո, մենք պետք է հասկանանք, որ մեր հիմնական խնդիրը ոչ թե միանձնյա իշխանությանը հակադրել նոր միանձնյա իշխանությունը, այլ ապահովել համակարգ, որտեղ իշխանությունը բաշխված է, զսպված է և ծառայում է ընդունակ անհատների և ինստիտուտների համախմբված ուժի շնորհիվ։
