Իրականում, Գերագույն հոգևոր խորհրդի 6 անդամ-եպիսկոպոսների արգելքը երկրից դուրս ելնելու վերաբերյալ ունեցող իրավական գործընթացը խոչընդոտում է Եպիսկոպոսաց ժողովի անցկացումը։ Այս մասին լրագրողների հետ զրույցում հայտնել է Մայր Աթոռի Արտաքին հարաբերությունների և արարողակարգի բաժնի տնօրեն Տ. Նաթան արքեպիսկոպոս Հովհաննիսյանը։
«Ամեն պարագայում, ամեն ինչ արվում է, որպեսզի այդ ժողովը խափանվի ու չկայանա։ Բնականաբար սա խոչընդոտ է, Եպիսկոպոսաց ժողովը պետք է ունենա եպիսկոպոսների ներկայությամբ»,- նշել է նա՝ ընդգծելով, որ եպիսկոպոսների առկայությունը ժողովի անցկացման համար անհրաժեշտ պայման է։
Արքեպիսկոպոսը նաև անդրադարձել է հանրության շրջանում շրջանառվող այն խոսակցություններին, թե արդյոք քննարկվում է Նիկոլ Փաշինյանի կողմից եկեղեցու բարենորոգման արշավին միացած եպիսկոպոսների կարգալուծության հարցը։ Նա նշել է, որ այդպիսի առաջարկները պարզապես շրջանառվում են հանրության շրջանում, սակայն պաշտոնական քննարկումներ դեռ չեն սկսվել։ Նա հավաստիացրել է, որ եթե քննարկումներ սկսվեն, դրանք գաղտնի չեն պահվի և հանրությանը տեղեկացվելու է։
Տ. Նաթան Սրբազանը նաև բացատրել է, թե ինչու է իշխանությունների կողմից կիրառվող այս գործընթացը օրինական չէ։ «Որևէ դատական ու իրավական մարմին օրենքի ուժով ու ոչ մի հոդվածով չի կարող նման հարկադրանք դնել Մայր Աթոռի վրա, որովհետև առաջնորդը պաշտոնյա աշխատող չէ, առաջնորդը ծառայում է ու նշանակվում է Ամենայն Հայոց Կաթողիկոսի կողմից, կարող է նաև ուրիշ պաշտոնի փոխվել՝ կրկին Կաթողիկոսի տնօրինությամբ»,- եզրափակել է նա՝ ընդգծելով, որ եկեղեցական առաջնորդների գործունեությունը չի կարող ենթարկվել պետական կառույցների կողմից կիրառվող սովորական իրավական մեխանիզմների։
Այս իրավական գործընթացը կապված է գնման մրցույթ չհայտարարելու՝ դատարանի որոշումը չկատարելու հետ։ Իրավական ոլորտում այս գործընթացը հանգեցրել է նրան, որ Գերագույն հոգևոր խորհրդի անդամների ելքը երկրից արգելափակվել է։
